Adinekoentzako laguntza egoitzaratzea prestatzeko
Egoitza batean sartzea gertaera biziki garrantzitsua da pertsona baten bizitzan, trantsizio-aldi bat, alegia eta, beraz, oso esperientzia estresagarria da adinekoarentzat, are larriago edo astunagoa, inguruabarren zioz, prestakuntza aldirik izan ez denean. Horregatik, ahal den neurrian, funtsezkoa da adinekoari egoitzaratzeko prestatzen laguntzea.
- Pertsona egoitzan sar dadin prestatzeko, hauexek izan daitezke baliagarriak:
- Informazio liburuxka argiak izatea, pertsonek egiatan jakin dezaten egoitzako bizimodua nolakoa den eta arreta nola eskaintzen den.
- Egoitzako giroa −ospakizun une berezietan zein eguneroko bizitzan− nolakoa den erakusten duten bideoak ikustea.
- Egoitzaratu aurretik, bisita bat edo batzuk egitea egoitzan.
Egoitzaratu aurreko hastapeneko harremanetan, garrantzitsua da egoiliarrarentzat erreferentziazko profesionala izango denak aurkeztea eta egoiliarraren aurrean ulerkor eta lasaigarri agertzea, erabaki horrek adinekoarentzat eta haren senideentzat daukan garrantziaz jabetuta.
Era berean, garrantzizkoa da langileek eta senideek osagarriak diren bi alderdiren berri adinekoari adierazten jakitea: alde batetik, egoitzako bizitza lehengo bizitzaren jarraipena dela azpimarratzea, aukera berriak zabaltzen direla, adinekoak bere bizi ibilbidean txertatzen dela ikus dezan; bestetik, oso argi utzi behar zaio egoitzatik irten daitekeela, eta nahi izanez gero, etxea berriro bisitatu dezakeela, auzora joaten jarraitu dezakeela, pertsona seguru sentitu deneko leku ezagunak diren aldetik.
