Erreferentzialtasun egonkorra

Garrantzi handikoa da, hala berean, jarraitutasun sentipena bermatzea arretaren antolaketari zuzenean lotutako alderdietan. Horri dagokionez, literatura espezializatuak dio erarik egokiena erreferentzialtasun egonkorreko sistema bat aplikatzea dela, eta sistema horrek bi elementu dituela:

• Alde batetik, erreferente gisa jardungo duen profesionala esleitzea egoiliar bakoitzari.  Bien arteko lotura jator eta enpatikoa sortzen ez bada –hori gerta daiteke profesionalaren  esleipena egonaldiaren hasieran egiten delako– erreferentearen harreman mota hori garatu duen profesional bati esleitzen saiatzea komeni da. 

• Bestetik, arreta talde egonkorrak ezartzea, profesionalen talde berak egoiliar bakoitzari arreta jarraitua ematen diola bermatzeko helburuz. Zenbait azterlanetan egiaztatu den bezala, eginbide horren onurak honako hauek dira:
  • Arreta pertsonalizatuagoa ematea lortuko da horrela, profesionalek hobetu ezagutzen baitituzte egoiliarrak. Ildo horretan, antzeman da adineko pertsonek itxura zainduagoa dutela, pertsonalagoa, eta, gainera, etzanera ultzera edo eskara gutxiago izaten dute; bidenabar, errazagoa da haien beharrak ezagutzea eta aldez aurretik konpontzea, edo gustuko ez dituzten egoerak saihestea.
  • Profesionalen gogobetetze maila handitzen da, eta egoitzetako langileen txandakatzea murrizten ere lagun dezake.
  • Langileak aintzat hartuta sentitzen dira, beren trebetasunak, esperientzia eta artatzen dituzten adinekoen inguruko ezagutza areago balioesten direla sentitzen dute.
  • Langileak ahaldunduta sentitzen dira eta euren zaintzapean dauden adineko egoiliarren arretaren arduraz jabetzen dira.
  • Harremanak indartu egiten dira, pertsona berekiko harreman iraunkorra lantzeak aukera ematen baitu harreman jatorrak finkatzeko; jakina denez, zaila da horrelako loturak eratzea oso noizean behin ikusten diren pertsonekin, eta horrek, zalantzarik gabe, eragina dauka eskaintzen den zaintzaren pertsonalizazioan.
  • Absentismo tasak ere behera egiten du, batetik, profesionalek talde bateko kide direla sentitzen dutelako, eta bestetik, beren arduraz kargutzen direlako eta egoiliarrekin lotuago daudela ohartzen direlako.