Nola eman laguntza jarduerak egiteko?

Parte hartzeko aukerak identifikatu eta, hala badagokio, sortu ondoren, hurrengo etapa ezinduaren esku nola jarri zehaztea da; alegia, jarduera prestatu behar da. Jarduera prestatzeak jarduera burutzerakoan nahasketa arriskua murrizten du eta parte hartzea errazteko behar den edo komenigarria denhori guztia barne hartzen du.Ikus ditzagun adibide batzuk:

• Ezintasunen bat duen pertsonarekin jarduera bat egin behar dugunean, komenigarria da behar diren neurriak hartzea kontzentrazioa edukitzeko eta, hortaz, kanpoko etenaldi kopurua mugatzeko. Hala, adibidez, komenigarria izan daiteke langileetako batekin adostea hura izatea telefonoa erantzuteaz edo atea irekitzeaz arduratuko dena tinbrea jotzen badute.
• Zenbait kasutan, komenigarria izan daiteke jarduera burutuko den gelan pertsona gehiagorik ez egotea eta horrek esan nahi du antolatu egin behar dela eta gainontzeko taldearentzat beste jarduera edo zeregin batzuk aurreikusi.
• Kontzentratzeko zailtasun handiak dituzten pertsonak direnean, komenigarria da guztia prest edukitzea, jarduera lehenbailehen has dezaten. Esaterako, gosaltzerakoan, erabilgarria izan daiteke dagoeneko mahai gainean edukitzea, ogia, zukua, marmelada eta zerealak, pertsonak eseri bezain pronto jan ditzan.
• Gurpildun aulkian dagoen pertsona batekin paseatzera atera nahi izanez gero, aurretik ibilbidea aurreikusi behar da eta bide osoa erabilgarria eta irisgarria dela bermatu behar da.