Jokabideari lotutako laguntza positiboko planen diseinua

Zer eta nola ebaluatu

Jokabideari lotutako laguntza positiboko planak eraginkorrak dira emaitza adierazgarriak ekartzen dituztenean, hau da, pertsonarentzat, familiarentzat, langileentzat eta komunitatearentzat emaitza adierazgarriak sortzen dituztenean. Jokabide gatazkatsuek eragin adierazgarria eduki dezaketenez pertsonaren bizi kalitatean (adibidez, harremanetan, erakargarri egiten zaizkion jardueretara sartzean, barneratze mailan), beharrezkoa da jokabideari lotutako laguntzaren planaren eraginkortasuna ebaluatzea langile mailan lortu diren emaitza adierazgarrien arabera

Jokabideari lotutako laguntzako plan bat ebaluatzeko garaian, aintzat hartu hurrengo galderak:

• Zer nolako informazioa bildu behar duzu?
• Zer egingo duzu informazio hori biltzeko?
• Nola erabiliko duzu bildutako informazioa erabakiak hartzerakoan?

Zer informazio bildu erabakitzeko eta hura ebaluatzeko, laguntza planaren berariazko helburuak eduki behar ditugu gidari, izan ere, horiek pertsonaren bakarkako beharrei erantzuteko diseinatu dira. Egiaztatu behar diren helburu nabarmenenak hauek dira:

• gaitasun alternatiboen erabilera areagotu den (xede den jokabidea ordezkatzeko jokabideak, gaitasun orokorrak eta tolerantziako edo aurre egiteko gaitasunak);
• jokabide gatazkatsuaren maiztasuna murriztea.

Beharrezkoa izan daiteke emaitza hauek berraztertzea denbora tarte jakin batean eta egoera eta testuinguru ezberdinetan (adibidez, goizez komunitatean, etxean edo lanean egiten diren jarduera ezberdinetan).

Halaber, interesgarria izan daiteke izaera orokorrago bateko emaitzak neurtzea, adibidez bizi estiloan egiten diren esku-hartzeetatik eratorritakoak, hain zuzen ere: bigarren mailako eragin positiboak, adibidez laneko parte-hartzean izandako hobekuntza maila edo hazkundea; hobekuntzak osasun egoeran (adibidez, sendagai psikotropikoen erabilera murriztea, bere burua kaltetzeko jokabideek eragindako zauriak gutxitzea), edo pertsonaren, familiaren eta langileen gogobetetasun maila areagotzea lortutako emaitzekiko, jokabideari lotutako laguntza positiboko plana aplikatu izanaren ondotik. Bizi estiloaren gaineko esku-hartzeen emaitzak ere neurtzerik dago bizi kalitateari erreparatuz: lanbide jardueretan, komunitatekoetan edo aisiakoetan parte hartze handiagoa, hautapen eta kontroleko aukera gehiago, eta harremanen alorreko hobekuntzak.

Informazioa biltzeko eta edukiak ebaluatzeko metodo onena erabakiak hartzeko informazio erabilgarriena ematen duen hori da, betiere, informazio hori biltzen den inguruneko ohiko jardueretan eraginik eduki gabe, hurrengo taulan ikus daitekeen bezala, informazioa biltzeko modu ezberdinak daude:

• Behaketa zuzenetan jokabide gatazkatsuak zer maiztasunarekin gertatzen diren zenbatu behar da, eta bereziki erabilgarriak dira behaketa hauek jokabide gatazkatsuak zer neurritan murriztu diren eta eguneko lanbide eta jarduera inguruneetan gaitasun alternatiboen erabilera zer neurritan areagotu den zehazteko.
• Beste metodo informalago batzuk, adibidez komunikazio erregistroak, hobeki egokitzen dira etxeko edo laneko ingurunean aplikatzeko.
• Emaitza zabalagoak, pertsonaren bizi estiloan, osasun egoeran edo gogobetetasun mailan ikusi diren hobekuntzei buruzkoak kasu, metodo ezberdinen bitartez ebaluatu daitezke: zerbitzuaren ohiko erregistro agirietan bildutako datuak (adibidez, oharrak banakako txostenetan, gertakarien erregistroak, bileretako aktak), baina, baita ere, zerbitzuan egindako aldizkako ebaluazioetan lortutako emaitzak (adibidez, gizarte eskalak, hautapen aukerak baliatzerakoan izandako aurrerapenen eskalak, eta abar).

Aukera bat hautatu baino lehen, galde iezaiozu zure buruari zer agiri mota existitzen den jada ingurune horretan, eta baita nola erabil daitezkeen ere informazioa biltzeko.

Zer bildu eta nola bildu zehazteaz gain, beharrezkoa da ere hori egiteaz nor edo nortzuk arduratuko diren zehaztea:

• Nork bilduko du informazio elementu bakoitza eta zein ingurunetan?
• Nor arduratuko da informazio hori laburbildu eta interpretatzeaz?
• Noiz eta zein maiztasunarekin bilduko da informazioa?
• Nortzuk bilduko dira, noiz eta zein maiztasunarekin, bildutako informazioa aztertu eta eztabaidatzeko erabakiak hartu aurretik?